Cezar
Al ribelulino
Mi kovras vin
en fridaj aĉaj tagoj,
en laŭta bru',
en trista flu',
se ni pro grandaj plagoj
ne gajos plu.
Mi helpos vin,
se homoj nin forlasos
ĉe eta vent'
kaj eĉ sen pent',
se la malam' amasos
pro fia sent'.
Mi portos vin,
se ĉiuj vin jam ĉasos,
ho vi, cervin'.
Se ili serĉos vin ;
se monstroj preterpasos,
ni savos nin.
Mi devus eĉ
ne laŭte tion ĵuri
pro via fort'.
De l' rev' ĝis mort'
ne devos ni forkuri,
jen mia vort' !